ஈரான் மீதான தாக்குதலுக்குக் கண்டனம்: ஈரானின் இராணுவத் தளங்களை இலக்குவைத்து இஸ்ரேல் இன்று நடத்திய விமானத் தாக்குதலுக்குப் பல நாடுகள் கண்டனம் தெரிவித்துள்ளன.
அதேநேரம், அமெரிக்காவும் பிரித்தானியாவும் இஸ்ரேல் மேற்கொண்ட தாக்குதலை நியாயப்படுத்தியுள்ளன. தன்னைத் தற்காத்துக்கொள்ளும் உரிமை இஸ்ரேலுக்கு உள்ளது என்று அந்த நாடுகள் தெரிவித்துள்ளன.
இஸ்ரேல் இன்று நடத்திய தாக்குதலில் சுமார் 20 இராணுவத் தளங்கள் இலக்கானதாகவும் இருவர் கொல்லப்பட்டதாகவும் ஈரானிய பாதுகாப்புப் படைத் தலைமையகம் தெரிவித்துள்ளது. எனினும், இஸ்ரேலின் தாக்குதலை முறியடித்துவிட்டதாகவும் ஈரான் படையினர் தெரிவித்துள்ளனர்.
இஸ்ரேலின் தாக்குதலையடுத்து ஈரான் வான்பரப்பின் பாதுகாப்பு முறைமை செயற்படுத்தப்பட்டுள்ளது. அத்துடன், ஈரான், ஈராக் விமான சேவைகள் அனைத்தும் இரத்துச்செய்யப்பட்டன.
ஈரான் மீதான தாக்குதலுக்குக் கண்டனம் தெரிவித்து ஓமான், ஈராக், பாகிஸ்தான், மலேசியா, சவூதி ஆரேபியா, ஐக்கிய அரபு இராச்சியம் உள்ளிட்ட நாடுகள் அறிக்கை வெளியிட்டுள்ளன.
இஸ்ரேலின் ஆத்திரமூட்டும் தாக்குதல் ஈரானின் இறைமையை மீறும் செயல் என்றும் ஐக்கிய நாடுகள் சபையின் சாசனத்தை மீறும் நடவடிக்;கை என்றும் அந்த நாடுகள் தெரிவித்துள்ளன.
இதேநேரம், இஸ்ரேல் ஈரான் மீது நடத்திய தாக்குதலை வன்மையாகக் கண்டிப்பதாக ஹமாஸ் இயக்கமும் தெரிவித்துள்ளது.
ஈரானில் பயங்கரவாதத் தாக்குதல்
ஈரானில் பயங்கரவாதத் தாக்குதல்: இஸ்ரேல் தாக்குதல் நடத்திய சில மணித்தியாலங்களின் பின்னர் பயங்கரவாதத் தாக்குதலொன்றும் நடத்தப்பட்டுள்ளது. இதில் பொலிஸ் உததியோகத்தர்கள் கொல்லப்பட்டதாக ஈரான் தெரிவித்துள்ளது. இந்தத் தாக்குதலுக்கு எந்தவோர் அமைப்பும் இதுவரை உரிமை கோரவில்லை.
ஈரானில் பயங்கரவாதத் தாக்குதல் பொலிஸாரை இலக்கு வைத்தே நடத்தப்பட்டதாக சர்வதேச செய்திகள் கூறுகின்றன.
மலைக்குருவி
